نصائح مي العشرة للسفر:”الجزء الأول”

كتبت - مي فودة

0 274

Get real time updates directly on you device, subscribe now.

١_ماتشتريش شيبسي أو بسكوت أو باتيه معروض بره الكشك لأنه غالبا بيكون اتعرض للشمس لفترة طويلة ودخله درجة حرارة كبيرة “بتتلفه”
٢_الصبر،لما يكون مكتوب في تذكرتك ان قطرك هيطلع الساعة سبعة ومايجيش غير سبعة ونص مثلا ما تزهقش وتزعل وتقول هي سفرية باينة من أولها وتعيش دور إن اليوم اتقفل،لأن تأخير “القطارات”دي حاجة بتحصل في دول كتير جدا في العالم ،أكيد هي مش حاجة لطيفة لكن لازم تسستم نفسك إنها هتحصل بنسبة كبيرة
٣_”ابعد عن لعبة”تصادم السيارات”لو سافرت بالقطر حاول قبل مالقطر يوصل تقف عند المكان اللي هتقف فيه رقم”العربية”بتاعتك يعني لو عربيتك رقم تلاتة اسأل الناس اللي حواليك عربية تلاتة من المتوقع تقف فين،عشان لما القطر يوصل تدخل على كرسيك على طول ما تحتاجش تمشي مسافة طويلة جوه القطر،لأن المشي جوه القطر لمسافة طويلة أشبه الحقيقة بإنك ماشي بعربيتك على الطريق المعاكس بتحاول تتفادى العربيات اللي بتخبط فيك،فمش بعيد أبدا طبعا تطلع بكدمات بعد ما تخلص رحلة المشي جوه القطر لأن الموضوع مش بيبقى تصادم سيارات وخلاص لأ ده تصادم ،ناس،وشنط في رجلك وقفاك ودماغك وصدقني بيبقى الموضوع أصعب من السيارات
٤_عاملي كل الناس حلو في أي طريق تكوني فيه أو أي مكان وابتسمي في وش كل الناس لكن لو حسيتي إن فيه أي حد بيستظرف “من اللي “بيتسموا رجالة للأسف” الإبتسامة دي تتحول نظرات احتقار،واديله فوق دماغه،بهزر معاكي يا بنت الناس امشي وسيبيه وكبري دماغك منه احنا مش مسافرين عشان نتخانق ونربي الناس ،احنا مسافرين عشان نتبسط ونروق دماغنا والله
٥-اوعوا تنسوا الأسيتون:
طبعا كلكم فاكرين إن النصيحة دي للبنات بس ،لأ دي لكل الناس ،الأسيتون مش عشان نشيل المانكير بس لأ الأسيتون هو الحل الأمثل لمشاكل كتير جدا بتحصل في السفر،بقعة شوكولاتة وقعت على هدومك،أو صلصة وانت داخل على شغل ومستعجل،يبقى لازم تستخدم الأسيتون،اللابتوب بتاعك اترب أو اتوسخ من أي حاجة هتحتاج أسيتون ينظفه من بره فعليكوا بنقطة أسيتون في قطعة “قطنة” وعيشوا
٦_بلاش كشري الله يرضى عليك في المواصلات ما حبكتش والله،أنا مش بقولك تجيب من كنتاكي وتبوظ ميزانيتك،لأ فيه أكل سعره كويس ومابيطلعش ريحة وبيقلب المكان وبيقلب بطنك أنت شخصيا بعد ما بتكون معتقد إنك استمتعت بمزيج العدس بجبه على المكرونة على الرز على العدس الأصفر على البصل على الحمص على الشطة واللمون والكمون،أيوة أيوة دي المكونات الموجودة في الكشري والله اللي بتأذي نفسك بيها وانت مسافر قبل ما بتأذي الناس وبتتعرض للآتي”وجع بطن،قيئ،انتفاخات وحاجات تانية مافيش داعي نتكلم فيها
٧_الشباب مش لازم تلبسوا ساعة “رولكس” بتاعتكم،والبنات مش لازم تلبسوا كل الإكسوارات بتاعتكم وشنطة “شانيل”
مش هتتجوزوا في الطريق والله،ولو حد حقيقي أعجب بيكي هيعجب بيكي عشان نفسك وروحك وشخصيتك مش عشان اللي انت لابساه وعاملاه ومكلفاه،البساطة أحلى حاجة في الدنيا على فكرة،خليكي طبيعية دايما وخليكي نفسك دايما
٨_الشباب مش لازم تلبسوا “التيشرت” الضيق اللي يبين للناس والبنات خصوصا مدى “الفيزكل فيتنس” بتاعتكم،البسوا لبس مريح وواسع عشان أنتوا أكتر ناس هتندموا طول الرحلة إذا لبستوا لبس ضيق
٩_حطوا شنطكم فوق كراسيكم،مش لازم تتطيروا الشنط فوق كرسي حد تاني عشان ممكن صاحب الكرسي ييجي ويلاقي مكان الشنطة متاخد ونزعل كلنا من بعض
١٠_حطوا شنطكم بطريقة ما تاخدش مساحة ما ترموهاش بأي طريقة وخلاص،احتراما برضو للناس اللي هتيجي تدور على مكان لشنطها وهتلاقيه ضيق.

Get real time updates directly on you device, subscribe now.

تعليقات
Loading...
error: Content is protected !!